Let us safeguard Mohan Bairagi the voice of the movement : తెలంగాణ ఉద్యమ నాయకుడు మోహన్ బైరాగి ఆరోగ్య పరిరక్షణకు సమాజం అండగా నిలవాల్సిన అవసరం ఉంది. తెలంగాణ ఉద్యమ చరిత్రలో తన గళం, కలం, కళతో ప్రజా చైతన్యాన్ని విస్తరించిన ఉద్యమ నాయకుడు, విప్లవ కవి, గేయ రచయిత, జర్నలిస్టు మోహన్ బైరాగి ప్రస్తుతం తీవ్ర అనారోగ్యంతో చికిత్స పొందుతున్నారు. ఇటీవల ఆకస్మికంగా షుగర్ స్థాయిలు తీవ్రంగా పడిపోవడంతో ఆయన కోమా స్థితికి చేరువయ్యారు. నాలుగు రోజుల పాటు మాట్లాడలేని పరిస్థితి నెలకొనగా, షుగర్ ఇన్ఫెక్షన్ కారణంగా కుడికాలు ప్రభావితమై నడవలేని స్థితి ఏర్పడింది. ప్రస్తుతం ఆరోగ్యం కొంత స్థిరంగా ఉన్నప్పటికీ, పూర్తి కోలుకోవడానికి దీర్ఘకాలిక వైద్య చికిత్స, విశ్రాంతి అవసరమని వైద్యులు సూచించారు.
మోహన్ బైరాగి అనేక సంవత్సరాలుగా మధుమేహంతో బాధపడుతున్నప్పటికీ, తన వ్యక్తిగత ఆరోగ్యాన్ని పక్కనబెట్టి ప్రజల కోసం, తాను నమ్మిన ఆశయాల కోసం ఉద్యమ జీవితాన్ని కొనసాగించారు. వ్యక్తిగత కష్టాల కంటే ప్రజా ప్రయోజనాలనే ముఖ్యంగా భావించిన ఆయన జీవితం ఉద్యమ నిబద్ధతకు ప్రతీకగా నిలిచింది.
అరుణోదయ సాంస్కృతిక సమాఖ్య ఉద్యమకారునిగా మోహన్ బైరాగి తెలంగాణ సమాజానికి సుపరిచితమైన వ్యక్తి. తెలంగాణ ఉద్యమంలో ఆయన పాత్ర కేవలం కళాకారుడిగా మాత్రమే కాకుండా ప్రజా చైతన్యాన్ని రగిలించిన సాంస్కృతిక యోధుడిగా గుర్తింపు పొందింది. తన పాటల ద్వారా, కవిత్వం ద్వారా, ప్రసంగాల ద్వారా ప్రజల సమస్యలను పాలకుల ముందుంచుతూ, అవినీతి, దోపిడీ, ప్రజా వ్యతిరేక విధానాలను ధైర్యంగా ప్రశ్నించారు. అధికార రాజకీయాలకు తలవంచకుండా, ప్రజల పక్షాన నిలిచి అనేక సందర్భాల్లో ఉద్యమ శక్తులకు స్ఫూర్తినిచ్చారు.
తెలంగాణ రాష్ట్ర సాధన ఉద్యమంతో పాటు విప్లవోద్యమం, సామాజిక తెలంగాణ భావజాలం, బహుజన రాజ్యాధికారం, కుల నిర్మూలన, ఎస్సీ వర్గీకరణ వంటి అనేక సామాజిక ఉద్యమాలకు మోహన్ బైరాగి తనవంతు విశేష కృషి చేశారు. విభిన్న ఉద్యమ శక్తుల మధ్య చర్చలు, వాదోపవాదాలు, విమర్శ-ఆత్మవిమర్శల ద్వారా ప్రజా ఉద్యమాన్ని మరింత బలోపేతం చేయడానికి నిరంతరం కృషి చేశారు. ఉద్యమ ఐక్యతకు, పీడిత వర్గాల విముక్తికి ఆయన చేసిన కృషి విశేషమైనదిగా భావించబడుతుంది.
విప్లవ కవిగా, గేయ రచయితగా, జర్నలిస్టుగా ప్రజా సమస్యలపై నిరంతరం స్పందించిన మోహన్ బైరాగి అనేక సందర్భాల్లో ఎవడైతే ఎందిరా చెట్టుమీది కొంగలే జనం సొమ్ము తిన మరిగిన బట్టబజ్ లంగాలే అంటూ దొంగ నాయకుల గుట్టు రట్టు చేసి, అధికార వర్గాల ఆగ్రహానికి గురయ్యారు. ప్రజల పక్షాన నిర్భయంగా మాట్లాడిన కారణంగా కుట్రపూరిత కేసులను ఎదుర్కొని జైలు జీవితాన్ని కూడా అనుభవించారు.
అయినప్పటికీ తన ఉద్యమ మార్గాన్ని విడిచిపెట్టకుండా ప్రజల పక్షానే నిలిచారు. ప్రస్తుతం కూడా జర్నలిస్ట్ ఫ్రంట్ నాయకుడిగా, టీయూజేఏసీ రాష్ట్ర ఉపాధ్యక్షునిగా ప్రజా ఉద్యమాలతో అనుబంధాన్ని కొనసాగిస్తున్నారు.
ఇలాంటి ఉద్యమకారుడు తీవ్రమైన అనారోగ్యానికి గురికావడం తెలంగాణ ఉద్యమ శ్రేణులకు, ప్రజాస్వామ్య శక్తులకు ఆందోళన కలిగించే అంశంగా మారింది. ఇప్పటికే ఆయన కుటుంబం ఆర్థిక ఇబ్బందులతో సతమతమవుతున్న నేపథ్యంలో మెరుగైన వైద్య చికిత్స అందించడానికి కూడా ఇబ్బందులు ఎదుర్కొంటోంది. ఉద్యమ జీవితాన్ని ప్రజలకు అంకితం చేసిన వ్యక్తి కుటుంబం నేడు ఆర్థికంగా ఇలాంటి క్లిష్ట పరిస్థితిని ఎదుర్కోవడం సమాజం ఆలోచించాల్సిన విషయంగా నిలుస్తోంది.
తెలంగాణ ఉద్యమ చరిత్రను పరిశీలిస్తే ఉద్యమానికి జీవితాన్ని అంకితం చేసిన అనేక మంది కవులు, కళాకారులు, జర్నలిస్టులు, ఉద్యమ నాయకులు వృద్ధాప్యం, అనారోగ్యం, ఆర్థిక ఇబ్బందుల కారణంగా తీవ్ర కష్టాలను ఎదుర్కొన్న ఉదాహరణలు కనిపిస్తాయి. ప్రజా ఉద్యమాల కోసం జీవితాన్ని ధారపోసిన వారిలో పలువురు తగిన ఆదరణ, సంక్షేమం లేకుండా జీవితం ముగించుకోవాల్సి వచ్చింది. ఇది ఉద్యమ సమాజం ముందున్న ఒక ముఖ్యమైన సామాజిక బాధ్యతను గుర్తుచేస్తుంది.
తెలంగాణ రాష్ట్ర ఆవిర్భావం తర్వాత ఉద్యమకారుల సంక్షేమంపై ఎన్నో ఆశలు వ్యక్తమైనప్పటికీ, ఉద్యమంలో కీలకపాత్ర పోషించిన అనేక మంది కళాకారులు, రచయితలు, ఉద్యమ నాయకులు ఇప్పటికీ తగిన గుర్తింపు, భరోసా, సంక్షేమం కోసం ఎదురుచూస్తున్నారు.
తెలంగాణ ఉద్యమంలో నిజాయితీగా పనిచేసిన ఎంతో మంది ఉద్యమకారులు ఈ మధ్య కాలంలో కాలం చేశారు. ప్రజయుద్ధ నౌక గద్దర్, సియసత్ ఎడిటర్ జహీర్ అలీ ఖాన్, అందే శ్రీ , అరుణోదయ నాగన్న, జహంగీర్ , గిరిపల్లి మల్లేశం, గుండా యాదగిరి లాంటి అనేక మంది కవులు,కళాకారులు, ఉద్యమకారులు వృద్ధాప్యం, అనారోగ్యం చేత, మరికొంతమంది ఆర్థిక ఇబ్బందులతో మరణించారు. గిరిపల్లి మల్లేశం లాంటి తెలంగాణ ఉద్యమ కళాకారులు ఆర్థిక ఇబ్బందులతో ఆత్మ హత్యలకు పాల్పడ్డారు. గద్దర్ అన్నతో పాటు కాలు కాలు కలిపి కదం తొక్కి, గజ్జె కట్టి, కాసేపోసి గోసిపెట్టి, ధూమ్ ధామ్ అంటూ ఎగిరి గంతేసి, దప్పుకొట్టి ఆడిపాడినొల్లు నేడు ఒక్కొక్కరు నేల
రాలుతున్నారు. కొట్లాడి తెచ్చుకున్న తెలంగాణ బతుకునియ్యాక పోయేననీ నిరాశా, నిస్పృహతో నిష్క్రమిస్తున్నారు.
తెలంగాణ రాష్ట్ర ఆవిర్భావం తర్వాత అధికారంలోకి వచ్చిన దొరల పాలనలో దశాబ్ద కాలం పాటు దళారులదే ఇష్టా రాజ్యమైంది. సాంస్కృతిక శాఖలో రధసారధులై, కాసుల కక్కుర్తిలోపడి, అసలైన ఉద్యమ కళాకారులను విస్మరించారు. ఇప్పుడూ అంతేనా లేక వెన్నెలమ్మ సారధ్యంలో సగటు కళాకారుని బతుకు అడవిగాచిన వెన్నెలే అవుతుందా ! కాంగ్రెస్ ప్రభుత్వం అభయ హస్తంతో ఉద్యమకారుల జీవితాలు భస్మాసుర హస్తం కింద నలిగిపోతాయో, వెలిగి పోతాయో కొంతకాలం వేచి చూడాలి. ప్రజా ఉద్యమాలను ముందుండి నడిపించిన వారి జీవన భద్రత, ఆరోగ్య పరిరక్షణ, ఆర్థిక స్థిరత్వం వంటి అంశాలపై ప్రభుత్వాలు మరింత బాధ్యతాయుతంగా స్పందించాల్సిన అవసరం ఉందనే అభిప్రాయం వ్యక్తమవుతోంది.
ప్రస్తుతం మోహన్ బైరాగి ఆరోగ్యం వైద్యుల పర్యవేక్షణలో నిలకడగా ఉన్నప్పటికీ, ఆయన పూర్తిగా కోలుకోవడానికి కొంతకాలం విశ్రాంతి అవసరమని వైద్యులు సూచిస్తున్నారు. ఈ పరిస్థితిలో ఉద్యమ సహచరులు, ప్రజాస్వామ్యవాదులు, సాహిత్యవేత్తలు, కళాకారులు, తెలంగాణ సమాజం ఆయనకు నైతికంగా, మానవీయంగా అండగా నిలవాల్సిన అవసరం ఉంది.
ప్రజల కోసం తన జీవితాన్ని అంకితం చేసిన ఉద్యమకారులను అవసర సమయంలో ఆదుకోవడం సమాజం యొక్క నైతిక బాధ్యత. మోహన్ బైరాగి త్వరగా సంపూర్ణ ఆరోగ్యంతో కోలుకొని మళ్లీ తన ఉద్యమ, సాహిత్య, సాంస్కృతిక ప్రస్థానాన్ని కొనసాగించాలని తెలంగాణ సమాజం ఆకాంక్షిస్తోంది. ఉద్యమాల చరిత్రను నిర్మించిన గొంతుకలను కాపాడుకోవడం అంటే ఒక వ్యక్తిని మాత్రమే కాదు, ఒక ఉద్యమ స్ఫూర్తిని, ఒక ప్రజా చైతన్య సంపదను పరిరక్షించినట్లే అవుతుంది.
నోట్ :
మోహన్ బైరాగి అన్న కు తమ వంతు ఆర్ధిక సహాయం ఉద్యమమిత్రులు
ఈ నెంబర్ కు పంపగలరు
95730 88009
Phone pay /gpay
ఇట్లు
మీ ఉద్యమ సహచరుడు
కంచర్ల బద్రి
టీయుజేఎసీ
అధికార ప్రతినిధి
About the Author
