కాలాన్ని నమోదు చేసే పుస్తకం "ఆపరేషన్ కగార్"

పుస్తకం పేరు : ఆపరేషన్ కగార్ (విశ్లేషణాత్మక వ్యాసాలు – శాంతి చర్చల అవశ్యకత – స్పందలు)
పేజీలు : 128 వెల : రూ. 150 ప్రచురణ కాలం : జూన్, 2025 ప్రతులకు : తెలంగాణ పబ్లికేషన్, అన్ని లీడింగ్ బుక్ స్టాల్స్ తోపాటు ఆన్లైన్లో లభించును.
జస్టిస్ చంద్ర కుమార్ గారి ముందుమాటతో పాటు సిపిఐ ఎమ్మెల్యే కూనంనేని సాంబశివరావు గారు, కె. శీనివాస్ గారు, జి. రాములు గారు తదితర ప్రముఖుల విశ్లేషణలు, అధికారప్రతిపక్ష పార్టీల స్పందనలతో కూడిన పుస్తకం.

*********

A book that records the period “Operation Kagar” “నువ్వు పువ్వులన్నీ చిదిమేయగలవేమో గానీ వసంతం రాకుండా ఆపడం నీ తరం కాదు”. అంటారు నోబెల్ సాహిత్య పురస్కార గ్రహీత పాబ్లో నెరూడా. అందుకే మనుషులను భౌతికంగా అంతం చేసినంత మాత్రాన పరిష్కారం దొరుకదని చరిత్ర చెప్తున్న సత్యం. ఇది ప్రస్తుతం మధ్య భారతంలో ఆపరేషన్ కగార్ (అంతిమ యుద్ధం) పేరుతో మావోయిస్టులపై పాలకులు సాగిస్తున్న మారణహోమానికి కూడా వర్తిస్తుందని భావిస్తున్నాం.‌

ఆపరేషన్ కగార్ పేరుతో సాగుతున్న మారణ హోమంలో మావోయిస్టులపై పాలకులు పైచేయిగానే ఉన్నారు. కానీ ప్రజాస్వామ్య దేశంలో కనీస చర్చలకు కూడా తావివ్వకుండా ముందుకు సాగుతున్న ప్రజాస్వామ్య దేశం మనది అనక తప్పడం లేదు. ఇక్కడ పాలకులను ప్రశ్నించినా ప్రమాదమే అవుతుంది. ప్రజాస్వామ్యబద్ధంగా, రాజ్యాంగబద్ధంగా భావప్రకన చేసినా ప్రమాదమే. వారి కన్నుపడితే మన చేతిలో పెన్ను ఉన్నా గన్ను అవుతుంది. మన సంకలో రాజ్యాంగ పుస్తకం ఉన్నా అది నిషేధమే అవుతుంది. తక్షణమే వారు అర్బన్ నక్సలైట్లుగా ముద్ర పడిపోతారు.

ఎంతో గొప్పగా చెప్పుకునే ప్రజాస్వామ్య దేశంలో ఇలాంటి పరిస్థితి ప్రజాస్వామ్యానికి చేటు. ఆపరేషన్ కగార్ లో ప్రాణాలు కోల్పోతున్న వారు అటు మావోయిస్టులైనా, ఇటు పోలీసులు, భారత సైన్యం, ఎవరైనా మనుషులే. ఎవరు కూడా చనిపోకూడదనేదే మా ఉద్దేశ్యం. మనుషులను అంతమెందించినంత మాత్రానా శాశ్వత పరిష్కారం దొరకదనేది ఇరుపక్షాలు భావించాలని, శాంతి చర్చలే పరిష్కారం అని భావిస్తున్నాం.

A book that records the period “Operation Kagar”

ఆపరేషన్ కగార్ పై విశ్లేషణాత్మక వ్యాసాలు – స్పందనలు – శాంతి చర్చల అవశ్యకత స్పృహతో అనేక విభిన్న వ్యక్తుల అభిప్రాయాలు విశ్లేషణలతో కూడిన ఈ వ్యాస సంకలనం సమాజం ముందు పెట్టుతున్నాం. ఎవరి పక్షమో వహించి ఈ వ్యాసం సంకలనాన్ని పొందుపరుచడం లేదు. శాంతిని కాంక్షిస్తూ ప్రజాస్వామ్యాన్ని, రాజ్యాంగాన్ని గౌరవిస్తూ వాటిని కాపాడాలనే భావనతో ఈ వ్యాస సంకలనానికి పూనుకోవడం జరిగింది. చరిత్రలో ఒక కాలం సరైన విధంగా నమోదు కాకుంటే ఆ కాలపు చరిత్ర భవిష్యత్తు తరాలకు రకరకాలుగా అర్థం అవుతుంది. మొన్నటికి మొన్న తెలంగాణ చరిత్రను అదే చరిత్ర అన్నట్లుగా తెరకెక్కిన “రజాకార్” సినిమా లాగా.

అందుకే ఆపరేషన్ కగార్ కాలంలో ఎలాంటి భావ సంఘర్షణ జరిగింది. మేధావులు, ప్రజాస్వామ్యాన్ని కోరుకునే వారు ఎలాంటి అభిప్రాయాలు వ్యక్తపరిచారు. ఆపరేషన్ కగార్ కాలం ఎలా సాగింది అనేది నమోదు చేయడంలో భాగమే ఈ వ్యాస సంకలన ప్రయత్నం.

ఇందులో 25మంది రాసిన 40వ్యాసాలతో పాటు అధికార ప్రతిపక్ష పార్టీల స్పందనలు, వామపక్ష పార్టీలు, ప్రజాసంఘాలు, పౌర స్పందనలు కూడా పొందుపరుచడం జరిగింది. ఈ వ్యాస సంకలనంలోని వ్యాసాలు ఏకపక్షంగా లేవనేది, విభిన్న కోణాల్లో చర్చించిన వ్యాసాలు అనేది గమనించాలి. ఈ వ్యాస సంకలనం నిడివి రిత్యా, సమయాభావం రిత్యా, అవకాశం మేరకు సేకరించిన వ్యాసాలు స్పందనలు ఇందులో పొందుపరుచడం జరిగింది. ఇంకా అనేకులు, మేధావులు, విభిన్న కోణాల్లో వ్యక్తపరిచిన భావాల వ్యక్తీకరణను, అభిప్రాయాలను సేకరించలేకపోచ్చు. ఇందులో పొందుపరుచలేక పోవచ్చు. దీనిని సమాచార సేకరణలో జరిగిన లోటుగానే భావించాలని కోరుతున్నాం. ప్రస్తుత కాలమాన పరిస్థితుల్లో శక్తిమేరకు ఈ వ్యాస సంకలనం తిసుకొచ్చే ప్రయత్నం చేస్తున్నాం. ఈ చిన్న ప్రయత్నాన్ని ఆపరేషన్ కగార్ కాలంలో భావ వ్యక్తీకణగానే భావించి స్వాగతిస్తారని భావిస్తున్నాం.

దామెర రాజేందర్ (దారా) సీనియర్ జర్నలిస్ట్ పుస్తక సంపాదకులు